TE LAGO MO TE FEASOASOANI (#10863)

O ko Ou Mata Ko la ko te pogai o oku fakamoemoega, Tena gali ko toku lafiiga, Tena kiloga mao ko toku taugasoa, Tena alofa ko te pogai ne fai i ei au penei, Tena takuga ko toku faka-mafanafanaaga, Tena pili mai ko toku manakooga, Tena nofo mai ko toku manakoga sili mo toku faka-moemoega maluga.  E akai fakamolemole atu au ke se taofi mai ia au a mea ko la ko oti ne fakaeke aka ne Koe mo latou filifilia mai i Au tavini.  Aumai kia au, na la, a mea lei o te lalolagi nei mo te sua lalolagi.

Ko Koe, e tonu, kote Tupu o tagata katoa.  E seai aka foki se Atua na ko Koe, ko te Fakamagalo-Katoatoa, ko te Alofa Kaimalie-Katoatoa.

-Bahá'u'lláh
-----------------------

TE LAGO MO TE FEASOASOANI (#10864)

Toku Atua, toku Atua Fagasele, toku Tupu, toku Fakamoemoega!  Se a ate laulaufaiva e mafai o tuku atu a fakafetai kia Koe?  Au ne se fakalogo, a ko au ne fago ne Koe.  Ne fuli tua atu au kia Koe, kae ne fesoasoani alofa mai Koe ke fuli atu au kia Koe.  Au ko mate, kae ne fakaola au ne Koe ki te vai ote ola.  Au ko vaaivai, kae ne fakaola au ne Koe ki te vaai faka-te-lagi o Tau faipatiiga te la e tafe mai ite Pene o te Alofa-Kaimalie Katoatoa.

O te Kiloga Faka-te-Lagi!  A te foafoaaga katoa e mutana atu i te lauefa o Tou maumea; sa taofi mai i ei ate vai o Tou kaimalie, io me taofi mai ne Koe i te vasa o Tou atafai.  Au e akai totuli kia Koe ke lago kae fesoasoani mai i taimi katoa i so se nofonofooga, kae saala atu ki te lagi o Tou alofa mo Au mea-alofa mai ite vavau.  Koe, e tonu, ko te Aliki o te alofa mafola, mo te Tupu o te malo se gata mai.

-Bahá'u'lláh
-----------------------

TE LAGO MO TE FEASOASOANI (#10865)

E vikia Tou Igoa, O te Aliki te motou Atua!  A Koe i te tonuuga ko te Iloa o mea se laavea.  Aumai kia matou a te llei ko Tou poto katoatoa e mafai o iloa.  A Koe ko te Aliki maluga, ko te Mafi-Katoatoa, ko te Toe Fagasele.
     Tavaeega katoa e o Koe, O te Aliki!  Ka sala ne matou a Tou alofa ite Aso fakapatino kae ka fakalagolago katoa kia Koe, Tela ko Ia a te motou Aliki. Ko oti ne faka-mana a Koe, O te Atua!  Tuku mai kia matou a te llei mo me ko la e ttau ke mafai o fakaseai a mea katoa na ko Koe.  E tonu, a Koe ko te Aliki o lalolagi katoa.
     O te Atua! Taui a latou ko la ne kufaki mo te onosai i Ou aso, kae fakamaalosi a olotou loto ke sasale tonu i te auala o te Mea-tonu.  Tuku ifo, O te Aliki, a mea-alofa lei e mafai i ei ne latou o ulu atu ki Tou Palataiso filemu.  E maluga a Koe, O te Atua Aliki. Fai aka Au faka-manuiaaga faka-te-lagi ke to ifo ki fale o latou ko la e talitonu ia Koe.  Avatu fakavave, O te Atua, a fesoasoani faka-te-lagi ke mafai ne Au tavini o manumaalo.  E aofaga ne Koe a mea faiite e auala mai i te maalosi o Tau ikuuga pe la mo te mea e fiafia Koe ki ei.  Koe i te tonuuga ko te Tupu, ko te Faiite, ko te Atamai-Katoatoa.
     Fai atu: Te Atua e tonu ko te Tofuga o mea katoa.  E avatu ne Ia a mea uke mo te olaaga ki so se tino te la e finagalo ne Ia.  A ia tela ne Faiite ne ia a mea katoa, ko te Kamataga o mea ola katoa, ko te Aofaga, ko te Mafi-Katoatoa, ko te Faiite, ko te Atamai-Katoatoa.  A Ia ko te Mesentia o toe lasaga tafasili ite llei i lagi mo te lalolagi mo so se mea te la e nofo i vasia o latou.  Latou katoa e fai a tena fakatonuuga, a ko latou i te lagi mo te lalolagi e fakamanatu Ona tavaeega, kae kia Ia e foki atu katoa latou.

-The Báb
-----------------------

TE LAGO MO TE FEASOASOANI (#10866)

O toku Atua, toku Aliki mo toku Matai! Ko oti au ne motu mai ia latou ko la e pili mai kia au kae ko sala e auala atu ia Koe ke fai aka au ke tusaoloto mai ia latou katoa e nofo ite lalolagi kae e toka faeloa o maua a mea ko la e aogaa kae tavaegia mai i Ou mata.  Tuku ifo kia au a mea lei ko te mea ke mafai au o tu saoloto vagana ko Koe, kae aumai ki au se tufaga tai lasi mai i Au mea-alofa se laugina.  E tonu, a Koe ko te Aliki o te alofa lauefa.

-The Báb
-----------------------

TE LAGO MO TE FEASOASOANI (#10867)

Te Aliki! Matou e faka-alofa, faka-mealofa mai matou i Ou alofaaga; mativa, tuku ifo kia matou se tufaga mai i te vasa o Tou maumea; e oge mea, faka-tofu mai matou ne Koe; ko tafalalo kii a te olaaga, aumai kia matou a Tou mana.  A manu o te ea mo manu fekai o te laukele e maua faeloa a olotou meakai i aso taki tasi mai ia Koe a ko tino katoa e mai lalo i Tau kilokiloga mo Tou kaimalie atafai.
     Sa liakina a ia vaaivai tenei mai i Tou alofa matagofie kae mai i Tou Mafi avatu se fesoasoani ki te agaaga vaaivai tenei mai i Tou maumea.
     Tuku mai a meakai a matou i aso taki tasi kae fakauke ne Koe a mea aogaa ki omotou olaaga, ko te mea ke se fakana matou ki se isi aka na loa ko Koe, ke talanoa katoatoa mo Koe, ke sasale i Ou auala kae fakaasi atu Au mea lilo.  Ko Koe kote Mafi-Katoatoa mo te Alofa-Atafai mo te Pule o tino katoa.

-`Abdu'l-Bahá
-----------------------

TE LAGO MO TE FEASOASOANI (#10868)

O Koe ko te Aliki alofa! Matou ko Au tavini i Tou Auala, e lafi i Tou Mataloa mana.  Matou e sala ki se lafiiga kae fakasao ne te pou maalosi tenei, seai aka foki se koga e fuli matou ki iei vagana ko Tau puipiiga tokaaga malie.  Tausi mai matou, fakamanuia mai matou, fesoasoani kia matou, fai aka matou ke fiafia matou ki Tou lei, tavili a Ou tavaeega, tautali fua ite auala o te meatonu, ko te mea ke mafai ne matou o oko ki se tulaga maumea ko fakaseai i ei a mea katoa na loa ko Koe, kae maua a motou mea-alofa mai ite tai o Tou kaimalie, ko te mea ke tumau ate taumafai o fakamaluga a Tau Fakatokaaga kae talai atu Ou manogi gali ki koga mao, ko te mea ke se mafaufau matou kia matou loa kae fakasaga tonu kia Koe, kae liakina a mea katoa kae saga fua kia Koe.
     O ko Koe te Maua-o-Mea, ko Koe te Fakamagalo!  Aumai kia matou a Tou alofa kaimaie mo Tou alofa atafai.  Au mea-alofa mo Au fakaekeega, e fakatumau matou, ko te mea ke maua ne matou a motou fakamoemoega.  Ko Koe ate Maalosi, ko te Mafai, ko te Iloa, ko te Lavea; e tonu, ia Koe ko te Kaimalie, kae, e tonu, ia Koe ko te Alofa-Kaimalie Katoatoa, kae, e tonu, ko Koe ko te Fakamagalo-Katoatoa, ko Ia Tela e tuku ki ei a salamo, ko Ia Tela e fakamagalo ke oko foki loa ki agasala e tafasili i te mafa.

-`Abdu'l-Bahá
-----------------------

TE LAGO MO TE FEASOASOANI (#10869)

Se avea keatea, O te Aliki, a te epa fiafia tenei ko fola i Tou Igoa, kae se tamate gina ate ulaaga ko oti ne fakaka ne Tau afi tela e se maua o fakagata.  Sa taofi gina a te tafe o Tau vai ola  te la e musumusu fakatasi mo te lagi o Tou matagofie mo Tou fakamasauaaga, kae sa fakagata Au tavini mai i te sogi ne latou a Ou manogi suiti ko la e manava atu ki sausau o Tou alofa.
     Te Aliki! Fakamama aka a fanoanoa o Au tavini, ko olotou faigata ki te nofo llei, ko olotou tulaga malalo ki te silisili ese ko olotou fanoanoa ki te fiafia, O ko Koe te la e i Ou lima e pule ne Koe a tino katoa.
     Ko Koe, e tonu, ko te Tasi, ko te TokoTasi, ko te Mafi, ko te Iloa-Katoatoa, ko te Atamai-Katoatoa.

-`Abdu'l-Bahá
-----------------------

